«Қайрат» Чемпиондар лигасының негізгі кезеңіндегі алғашқы жеңісін тойлады

Қазақстанның футзал клубы «Қайрат» УЕФА Чемпиондар лигасы 2025/26 маусымының негізгі кезеңінде Хорватияның «Ново Вриеме» командасын жеңіп, турнирді сәтті бастады, деп хабарлайды dailykz.

Бұл кездесу 4-топтың алғашқы туры аясында өтті. Матчтар Хорватияның Макарска қаласында ұйымдастырылып жатыр – дәл осы жерде «Ново Вриеме» клубы өз ойындарын өткізеді.

Қайраттықтар тартысты өткен ойында қарсыластарын 3:2 есебімен тізе бүктірді. Қазақстан құрамасының ойыншылары жеңістің басты себепшісі болды: Біржан Оразов 8 және 9-минуттарда дубль жасап, екі доп соқты, ал Эдсон 16-минутта тағы бір голдың авторы атанды. Қарсылас командадан хорват Виктор Уго (24-минут) және бразилиялық Джон Леннон (40-минут) көзге түсті.

Сол топтағы екінші ойында португалиялық «Спортинг» Косовоның «Приштина» клубын 19:1 есебімен ойсырата ұтты. Осы ірі жеңістің арқасында лиссабондықтар қосымша көрсеткіштер бойынша бірінші орынға көтерілді, ал «Қайрат» үш ұпаймен екінші орында тұр. Келесі турда алматылықтар дәл сол «Спортингке» қарсы күш сынасады.

Айта кетсек, 4-топтан үш үздік команда элиталық раундқа жолдама алады. Өткен маусымда «Қайрат» финалға дейін жетіп, испаниялық «Пальмаға» есе жіберген болатын. Ал биыл бұл испан клубы негізгі кезеңде тағы бір қазақстандық команда – «Семеймен» бір топта өнер көрсетіп жатыр. «Семей» де өз алғашқы ойынында жеңіске жетті.