Қазақстанда тұрғын үй сатылымы күрт өсті
2025 жылдың шілде айында Қазақстан тұрғындары 39 742 тұрғын үй сатып алу-сату мәмілесін жасаған. Бұл маусым айымен салыстырғанда 19,4%-ға көп, деп хабарлайды dailykz. Бағаның өсуі мен зейнетақы жинақтарының белсенді шығарылуымен байланысты сұраныстың артуы байқалды.
Бұған дейін тұрғын үй нарығында бағаның өскені туралы хабарланған еді. Ай ішінде жаңа баспана 0,2%-ға, ал екінші нарықтағы пәтерлер 0,9%-ға қымбаттады. Бұл халық арасындағы тұрғын үйге деген сұраныстың ұлғаюымен байланысты.
Ұлттық статистика бюросының мәліметі бойынша, шілдеде 2025 жылы 39 742 мәміле тіркелді:
- Пәтерлер бойынша — 31 277 мәміле;
- Жеке үйлер бойынша — 8 465 мәміле.
Ай ішінде сұраныс 19,4%-ға артты: маусымда ел бойынша 33 273 мәміле болған еді. Пәтерлерге сұраныс 23%-ға өскен болса, жеке үйлерге 7,9%-ға артты.
Ең көп сатылым Астана (8 636) мен Алматы (8 432) қалаларында тіркелді. Сондай-ақ Қарағанды (2 756) және Алматы облыстарында (2 005) тұрғын үй саудасы қызу жүрді.
Айта кетерлігі, Астана мен Алматыдағы көрсеткіштер өткен жылмен салыстырғанда тиісінше 26,2% және 18,9% өссе, Қарағанды мен Алматы облыстарында керісінше 14,1% және 12,9% төмендеу байқалды.
Шымкент қаласында 1 872 мәміле тіркелді, бұл өткен жылмен салыстырғанда 8,5%-ға көп.
Зейнетақы жинақтарының шығарылуымен сұраныстың байланысы
Қазақстандағы тұрғын үйге сұраныстың өсуі зейнетақы нарығындағы белсенділікпен де сәйкес келеді. Шілде айында Бірыңғай жинақтаушы зейнетақы қоры (БЖЗҚ) азаматтардан 178 мыңға жуық зейнетақы жинағын шығаруға өтініш қабылдады. Бұл өткен жылмен салыстырғанда үш есе көп көрсеткіш.
Тұрғын үйге жұмсалу үшін 110,9 мың өтініш қабылданып, жалпы сомасы 56,2 миллиард теңге төленді. Демек, тұрғын үй нарығындағы қазіргі сұраныстың бір бөлігі дәл осы зейнетақы жинақтарын белсенді пайдалануымен байланысты болуы ықтимал.
Айта кету керек, бір жыл бұрынғы деректерге сәйкес, БЖЗҚ-ның зейнетақы жинақтарын пайдалану құқығы бар салымшылар саны 1 миллионнан аспайды.
Қазіргі уақытта бұл шығарылған қаражаттар жеке табыс салығына жатады, бірақ болашақта салық жойылмақ.
