Қазақстандықтардың тұрғын үй кезегіндегі нөмірлері неге өзгерді?
2025 жылдың мамыр айынан бастап Қазақстанда тұрғын үйге жаңа кезек жүйесі енгізілді. Осыдан кейін көптеген азаматтар өздерінің кезектегі нөмірлері өзгергенін байқады. Бұл қате емес, жүйенің жаңаруының нәтижесі, деп хабарлайды dailykz.
Жаңа кезек жүйесінің ерекшелігі
24 мамырдан бастап мемлекеттік тұрғын үй кезегін басқаруды “Отбасы банк” өз қолына алды. Банк ұлттық даму институтына айналып, жаңа функциялар атқара бастады.
Осы күннен бастап, егер қазақстандық соңғы бес жыл ішінде өз баспанасына ие болмаған болса, кезекке тұрып, мемлекеттен тұрғын үй алуға өтініш бере алады.
Алайда жүйе өзгерген соң азаматтар кезек нөмірлерінің бұрынғыдан өзгеше екенін байқады. “Крыша” порталының мәліметінше, бұл – қателік емес. Бұрынғыдай рет нөмірі көрсетілмейді, оның орнына жаңа идентификатор енгізілді. Ол азаматтың кезекке тұрған күнін және табыс деңгейін ескеріп есептеледі.
Қолдау түрі табыс деңгейіне байланысты
Жаңа жүйе бойынша азаматтың табысы мемлекеттен алатын көмектің түрін анықтайды:
- табысы төмен азаматтарға әкімдік жалдамалы тұрғын үй ұсынады;
- тұрақты табысы барларға жеңілдетілген шартпен ипотека қарастырылады.
Кезектегі мәртебені қалай білуге болады?
Тұрғын үй кезегіне өтініш бергісі келген қазақстандықтар бұл қызметті Тұрғын үймен қамтамасыз ету орталығы арқылы ала алады.
Ал кезектегі өз мәртебесін тексеру үшін бірнеше жол бар:
- “Отбасы банк” сайты арқылы
- “Қолжетімді тұрғын үй” бөлімін ашып,
- “Тұрғын үйге мұқтаж азаматтардың тізімі” бөлімін таңдау қажет.
- Тізімді аймақ бойынша жүктеп алуға болады.
- Тұрғын үймен қамтамасыз ету орталығы арқылы
- Порталда авторизациядан өтіп,
- “Мәртебемді білу” батырмасын басу жеткілікті.
- Ашылған терезеде кезекке тұрған күн мен категория көрсетіледі.
Қосымша ақпарат
Бұған дейін біз мемлекеттік тұрғын үй кезегіне өтініш бергенде қандай жағдайларда бас тартылатынын жазған едік.
Сонымен бірге, әрбір қазақстандықтың мемлекеттен 10 сотық жер алуға құқығы бар екенін еске саламыз. Жер кезегі мен тұрғын үй кезегі бір-біріне әсер етпейді.
