560 теңгеден жоғары: қазақстандық сарапшылар доллар бағамына жаңа болжам жасады
Қазақстандық сарапшылар теңге бағамы мен инфляцияға қатысты болжамдарын төмендетті. Доллар орташа есеппен 562,5 теңгеге дейін қымбаттауы мүмкін, ал инфляция бұрын күтілгеннен баяу төмендейді, деп хабарлайды NUR.KZ.
Маңызды: материалда келтірілген пікірлер мен болжамдар инвестициялық кеңес болып табылмайды. Инвестиция кез келген жағдайда тәуекелмен байланысты, шешім қабылдау жауапкершілігі инвестордың өзіне жүктеледі.
22 тамыздағы ресми дерекке сәйкес, доллардың бағамы 537,75 теңге болып белгіленді. Бұл көрсеткіш бір күнде 0,58 теңгеге төмендеді.
Алайда алдағы жылдары ұлттық валюта айтарлықтай әлсіреуі мүмкін. Мұндай қорытындыға ҚР Ұлттық банкі жүргізген қаржылық сарапшылар арасындағы макроэкономикалық сауалнама нәтижелері негіз болды.
Сарапшылардың болжамы:
- 2025 жылы доллар бағамы орташа есеппен – 522,8 теңге;
- 2026 жылы – 541,5 теңге;
- 2027 жылы – 562,5 теңге.
Ұлттық валютаның әлсіреуіне ықпал ететін факторлар қатарында: мұнай бағасының салыстырмалы түрде тұрақты, бірақ жоғары емес деңгейі, экспорт көлемінің қысқару қаупі, импорттың өсуі және инфляцияның күткеннен жоғары болуы атап өтілді.
Инфляцияға қатысты болжамдар да өзгерді:
- 2025 жылдың соңында күтілетін инфляция деңгейі бұрынғы 11% орнына 11,3% болуы мүмкін;
- 2026 жылға арналған болжам 9%-дан 9,5%-ға көтерілді;
- 2027 жылы керісінше жеңілдеу күтілуде – көрсеткіш 7%-дан 6,5%-ға төмендетілді.
Сонымен қатар, Ұлттық банк экономикалық болжамдарға қатысты белгісіздіктің сақталып отырғанын ескертеді. Сарапшылардың пікірлері олардың жеке көзқарасын білдіреді және инвестициялық шешім қабылдау үшін тікелей нұсқаулық ретінде қарастырылмауы тиіс.
Айта кетейік, бұған дейін Қазақстан ТМД елдері арасында жан басына шаққандағы ЖІӨ көлемі бойынша көш бастағаны хабарланған болатын.
