Георгий Жуков «Астана» мен «Қайратта» неге қазақ тілін толық меңгермегенін түсіндірді

Қазақстан құрамасы мен «Ақтөбе» клубының жартылай қорғаушысы Георгий Жуков шет тілдерін меңгеру тәжірибесі жайлы әңгімелеп берді, деп хабарлайды Sports.kz BorodAbata.kz-ке сілтеме жасап.

— Польшада қазір үш жылдан бері тұрамын. Бұған дейін екі жарым жыл «Висла» сапында ойнадым, ал қазір «Пуща» клубында жарты жыл болды. Қытайға кеткен кезде поляк тілім одан әрі жақсарды — жалғыздықта жүріп, ойымды да полякша құра бастадым. Сонымен қатар, тұрмыстық деңгейде қытай тілінде сөйлей аламын. Фламанд, орыс, ағылшын, француз және поляк тілдерін еркін қолданамын. Испан мен қытай тілін түсінемін. Қытайда адаспай өмір сүре аламын, — деді Жуков.

— Қазақ тілін де біраз меңгердім. Қытайда ойнаған кезде бұл тілім жақсарды, өйткені ол жақта этникалық ұйғырлар көп тұрады. Ұйғыр тілі қазақ тіліне ұқсайды, сондықтан әріптестерімнің әңгімесін тыңдағанда ойда бір тізбек автоматты түрде құрылады. Егер «Астана» мен «Қайратта» күнделікті қазақша сөйлескен болса, тілді әлдеқайда тез үйренер едім, — деп қосты ол.

Айта кетейік, Георгий Жуков әр жылдары «Астана» мен «Қайрат» клубтарында өнер көрсетті. Сондай-ақ ол Польша, Қытай, Нидерланд, Бельгия және Ресей чемпионаттарында да ойнаған. Қазір футболшы «Ақтөбе» сапында өнер көрсетеді.