Доллар 573 теңгеге жетуі мүмкін: сарапшылардың теңгеге қатысты күңгірт болжамы
Алдағы айда АҚШ долларының бағамы 541,7 теңгеге дейін өсіп, келесі жылы рекордтық 573 теңгеге жетуі ықтимал, деп хабарлайды dailykz.
Қазір Қазақстандағы ресми доллар бағамы – 539,49 теңге, бірақ бұл шегі емес дейді сарапшылар.
Қазақстан қаржыгерлер қауымдастығының (ҚҚҚ) мәліметінше, тамыздың соңына қарай теңге сәл әлсіреп, бір доллар 541,7 теңге болуы мүмкін. Дегенмен, сарапшылардың айтуынша, кейбір күрт өзгерістердің экономикалық негізі әлсіз. Теңгенің құнсыздануына әсер ететін факторлар бар, бірақ олар мұншалықты жоғары құбылмалылық туғызатындай ауқымды емес:
- сауда балансының оң сальдосының қысқаруы;
- шетел валютасына ішкі сұраныстың артуы;
- шикізат нарығындағы баға тұрақсыздығы.
Сарапшылардың болжамынша, бір жылдан кейін доллар 573 теңгеге дейін қымбаттауы мүмкін. Соңғы рет рекорд 2024 жылдың 30 шілдесінде тіркелген – 546,36 теңге.
Орта мерзімді перспективада теңге бағамына мұнай бағасы (66,5 доллар/баррель) және сауда балансының оң сальдосының қысқаруы әсер етеді. Қазақстан экспортының табысы азайып, елге түсетін шетел валютасы көлемі төмендейді. Сонымен қатар, ел ішіндегі жоғары сұраныс импортты арттырады.
Бұл жағдай инфляцияның үдеуіне ықпал етуі мүмкін: теңгенің әлсіреуі импорттық тауарлардың қымбаттауына және бизнес шығындарының өсуіне әкеледі, ал бұл шығындар түптің-түбінде тұтынушыларға жүктеледі.
Дегенмен, сарапшылар экономиканың өсуін де болжайды. Бір жылдан кейін ЖІӨ 4,9% деңгейінде өседі деп күтілуде (бұрынғы болжам – 4,5%). Бұған мемлекеттік инвестициялардың артуы, инфрақұрылымдық және ірі жобалардың жүзеге асуы, сондай-ақ табиғи ресурстар өндірісінің кеңеюі әсер етеді.
Айта кетейік, бұл тек сарапшылардың пікірі. Сондықтан мұндай болжамдарды инвестициялық шешім қабылдауда тікелей нұсқаулық ретінде қабылдамау керек.
