Серік Жұманғарин Қазақстандағы инфляция болжамын жариялады

Үкіметтің баспасөз конференциясында журналист рубльдің қазіргі бағамы 6,7 теңге екенін айтып, Ресейден тауар сатып алатын импорттаушылар үшін бұл «қалтаны қаққан» жағдай екенін атап өтті. Ол бұл фактордың Қазақстандағы инфляцияға қалай әсер ететінін және жалпы инфляция бойынша болжамды сұрады.

Серік Жұманғариннің айтуынша, рубльдің нығаюы біраз уақыттан бері жалғасып келеді. Оның тұрақтылығы Ресейдің ішкі экономикалық факторларына байланысты. «Бұл біздің экономикаға толықтай пайдалы деп айта алмаймын, бірақ кей тұстарда тиімді жақтары да бар. Мысалы, Актобеде ресейліктердің жоғары рубль бағамына байланысты қымбат тауарлар мен техниканы сатып алуы бізге қосымша табыс әкелуде», – деді ол.

Вице-премьер рубльдің қазақстандық инфляцияға әсері қазірдің өзінде байқалғанын айтты. «Біз Ресейден негізінен стандартты тауарлар немесе инвестициялық жобаларға арналған жабдықтар аламыз. Егер олардың бағасы қымбаттаса, бұл бізді ішкі өндірісті дамытуға ынталандырады», – деді ол.

Инфляция болжамы

Серік Жұманғариннің мәліметінше, үкімет биыл инфляцияны 9–11% деңгейінде ұстап тұруды мақсат етіп отыр. Ұлттық банк болжамы – 10,5–12,5%. Келесі жылы инфляцияны шамамен 10%-дан асырмау жоспарланған, ал кейін біртіндеп төмендету көзделуде.

«Шілде айының қорытындысы бойынша инфляция 1,8% деңгейінде тұрақтанды. Негізгі өсім – қызмет көрсету саласында, әсіресе коммуналдық қызметтер мен табиғи монополиялар секторында байқалады. Биыл тарифтік реформа инфляцияға 1,32% үлес қосуы керек еді, бірақ біз оны 0,8%-ға дейін қысқарттық», – деді Жұманғарин.

Доллар бағамы туралы пікір

Вице-премьер доллар бағамы – Ұлттық банктің құзырындағы мәселе екенін атап өтті:
«Бұл жөнінде үкімет пікір білдірмейді. Ұлттық банк – толықтай тәуелсіз орган, және ол өз шешімдерін дербес қабылдайды. Қазір олардың ұстанымы дұрыс деп есептеймін».

Мұнай бағасының ықпалы

Серік Жұманғарин мұнай бағасына қатысты да пікір білдірді:
«Халықаралық ұйымдардың өзі келесі жылы мұнай қанша болатынын нақты айта алмай отыр. Орташа жылдық баға 50 доллар болуы үшін соңғы бес айда баррель 40 доллардан аспауы керек. Ал биыл мұндай сценарий мүмкін емес. Демек, мұнай бағасы біздің экономикаға салыстырмалы түрде қолайлы әсер ететін болады».

Қазіргі уақытта Қазақстан – ЕАЭО елдері арасында инфляциясы ең жоғары мемлекет. 2025 жылғы шілдеде жылдық инфляция 11,8%-ды құрады. Алматыда бұл көрсеткіш 13,8%-ға жетіп, ел бойынша ең жоғары деңгей тіркелді.