«Біздің қатынастарымыз өзара емес»: Трамп Токаевқа жазған хатында нені меңзеді, түсіндірді Жұманғарин
Үкіметте вице-премьерге Дональд Трамптың Қасым-Жомарт Тоқаевқа жазған хатында «өзара емес қатынастар» туралы не айтқысы келгені сұралды, деп хабарлайды dailykz.
Жақында АҚШ президенті Қасым-Жомарт Тоқаевқа жолдаған хатында тарифтерді енгізу себептері түсіндірілген. Хатта Трамп: «Our relationship has been, unfortunately, far from Reciprocal», яғни «Біздің қатынастарымыз, өкінішке орай, өзара емес» деп жазған.
Қазақстанның вице-премьері Серік Жұманғарин журналистерге бұл сөздермен Трамп не меңзегенін түсіндірді:
«Бұл стандартты хат, тарату ретінде жіберілді. Ол тек Қазақстанға бағытталған жоқ. Неге бұл процесс АҚШ жағынан басталды? Өйткені Америка Құрама Штаттарының құрметті президенті есептейді: көптеген елдер ұзақ жылдар бойы америкалық экономиканың ашықтығын пайдаланып, өз нарықтарын тарифтік және тарифтік емес кедергілермен жауып келген, ал америкалықтар ашық саясат жүргізген. Осы тұрғыда, енді осы мәселелерде теңдікке қол жеткізу уақыты келді. Солай дегені», — деді Серік Жұманғарин.
Ол Қазақстанды кедергілер жасауда кінәлау қиын екенін де атап өтті:
«Біз 4,2 млрд долларға сауда жасаймыз, сауда балансымыз 50/50. Шамамен 2,2 млрд экспорт жасап, жеткіземіз. Экономикамыз ашық, біз ДСҰ мүшесіміз және Еуразиялық экономикалық одақта 3 мыңнан астам тауар бойынша жеңілдіктер алдық. ДСҰ тарифтік ставкаларын қолданамыз, сондықтан бізді қандай да бір кедергі немесе тарифтер орнатуда кінәлеу қиын.
Суперпротекционизммен айналысу бізге тиімді емес. Әрине, өз өндірушілерімізді қорғап, қолдаймыз, бірақ бұл халықаралық сауда мен елдің мүддесіне зиян келтірмей жүзеге асады», — деді Жұманғарин.
Еске салсақ, 8 шілдеде АҚШ президенті Дональд Трамп әлеуметтік желісінде Қазақстан Президентіне хат жариялап, 1 тамыздан бастап АҚШ Қазақстан тауарларына 25% тариф енгізетінін хабарлаған.
Кейін Сауда министрлігі жаңа тарифтерден босатылған тауарлардың басым бөлігі әлі де кедергісіз жеткізілетінін мәлімдеді.
Сонымен қатар Трамп BRICS-ті қолдайтын елдерге қосымша 10% сауда тарифін енгізуге қауіп төндірген. Қазақстан бұл ұйымның серіктесі болып табылады.
Экономистер АҚШ тарифтері Қазақстан экономикасына қалай әсер етуі мүмкін екенін түсіндірді. Мамандардың айтуынша, жаңа тарифтер ел экономикасына теріс әсер етуі ықтимал, себебі АҚШ-қа 200 млн долларлық жанама экспорт ескерілмеген.
10 шілдеде Қазақстан Президенті Қасым-Жомарт Тоқаев АҚШ президентіне Қазақстан тауарларына тариф енгізуге қатысты жауап хат жолдаған.
