Инвестициялық серпіліс: Ақмола облысында жаңа жобалар мен жұмыс орындары ашылуда
Ақмола облысы жыл сайын инвесторлар үшін ең тартымды аймақтардың біріне айналып келеді. Мұндағы табыстың сыры — бизнеске барынша қолайлы және тиімді жағдай жасауға бағытталған жүйелі саясатта. Аймақта инвесторлар өзін үйіндегідей сезініп, батыл жобаларын жүзеге асыра алуы үшін барлық мүмкіндік қарастырылған, деп хабарлайды dailykz ішкі саясат басқармасына сілтеме жасап.
Облыс әкімі Марат Ахметжановтың айтуынша, инвестициялық тартымдылық — жаңа кәсіпорындардың ашылуы, жұмыс орындарының құрылуы және өндірістің дамуы үшін басты фактор. Бұл сөздер нақты көрсеткіштермен дәлелденіп отыр: өңірде іске қосылған және дайындалып жатқан өндіріс орындарының саны күн санап артып келеді.
Инвесторларға арналған “бір терезе” қағидаты
Ақмола облысында инвесторлардың барлық мәселесі бір жерде, артық бюрократиясыз шешіледі. Жобалар “бір терезе” жүйесімен сүйемелденеді, ал индустриялық аймақтар толық инфрақұрылыммен қамтамасыз етілген. Осы себепті аймақтың инвестициялық портфелі ірі отандық және шетелдік жобалармен толығып отыр.
Инвестициялық штаб — бизнеске қолдау орталығы
Инвесторларға қолдау көрсетудің негізгі құралы — өңірлік инвестициялық штаб. Мұнда жер телімін бөлу, инженерлік желілерге қосылу сияқты өзекті мәселелер жедел шешіледі.
Кәсіпкерлік және өнеркәсіп басқармасында атап өткендей:
“Біз инвесторлардың жұмысын барынша жылдамдатуға тырысамыз. Мемлекеттік қолдауға үміткер әрбір жоба аймақтық үйлестіру кеңесінде мұқият қаралады. Онда бизнес-модель, инвестиция көлемі, жұмыс орындарын құру жоспары және күтілетін әлеуметтік-экономикалық әсер бағаланады.”
AQMOLA индустриялық аймағы — стратегиялық алаң
Ерекше назар аударарлық жоба — ел астанасына жақын орналасқан республикалық маңызы бар AQMOLA индустриялық аймағы. Аумағы 874 гектар болатын бұл арнайы дайындалған аймақ қажет болған жағдайда кеңейтіле алады. Қазірдің өзінде мұнда жалпы құны 1 трлн теңгеден асатын жеті ірі жоба портфелі жинақталған.
Ақмола облысы инвесторларға қолайлы жағдай жасап, жаңа өндірістер мен жұмыс орындарын құру арқылы аймақтың экономикалық өсімін нығайтып келеді.
