Үкімет «Бәйтерек» холдингінің капиталын 1 трлн теңгеге арттырып, құрылымын өзгертеді
Үкімет «Бәйтерек» холдингінің құрылымын өзгерту жоспарлары туралы хабарлады. Алдағы жылдары холдингтің капитализациясын 1 трлн теңгеге дейін ұлғайту көзделіп отыр, деп жазады dailykz ҚР ҰЭМ деректеріне сілтеме жасап.
Вице-премьер – Ұлттық экономика министрі Серік Жұманғарин «Бәйтерек» холдингінің жаңа құрылымы жобасын қарастырған жиналыс өткізді.
«Трансформация мақсаты – холдингті инвестиция тартудың басты драйверіне және Қазақстанның ЖІӨ-ін 2029 жылға дейін екі есеге арттыруға бағытталған проактивті экономикалық өсу саясатын жүзеге асырудың негізгі құралына айналдыру.
Елдің жаңа экономикалық өсу саясатының ерекшелігі – инвестицияларға нақты тәсілдеме: «жобаларға тапсырыс» механизмі арқылы, мемлекеттік нақты қажеттіліктерге негізделген», – делінген хабарламада.
Жаңа модельді жүзеге асыруда басты рөл «Бәйтерек» холдингіне берілген. Алдағы төрт жыл ішінде мемлекет холдингтің капитализациясын жыл сайын 1 трлн теңгеге арттырады, ал «Бәйтерек» жыл сайын басым жобаларды қаржыландыру үшін 8 трлн теңгеге дейін сыртқы несиелер тартады.
«Қазіргі «Бәйтерек» құрылымы басқарушы холдинг ретінде жаңа инвестициялық миссияның көлемі мен міндеттеріне сәйкес трансформацияланады. Ұйымдық модельді күшейту, инвестицияларға, салалық мамандандыруға және нарықтық талдауға назар аудару қажет», – деп атап өтті жиналыста.
Соңғы 30 жылдағы экономикалық құрылымды талдау металлургия, машина жасау, химия, АӨК және тамақ өнеркәсібі ең көп қосылған құндылықты қалыптастыратынын көрсетті. Бұларға сауда, қаржы және құрылыс секторы қосылады.
«Директорлар кеңесі тәуелсіз мүшелер санының өсуі арқылы күшейтіледі – бұл орындарға әлемнің жетекші салалары мен аймақтарынан халықаралық инвестициялық кеңесшілер шақырылады. Бұл шешімдердің ашықтығын, тәуекелдерді кешенді бағалауды және жобалардың сәттілігіне әсер ететін барлық факторларды қарастыруды қамтамасыз етеді.
Холдингті трансформациялауға қажетті барлық процедуралар биылдың соңына дейін аяқталуы жоспарланған», – деп хабарлады министрлікте.
Биылғы жылдың шілде айында Серік Жұманғарин «Бәйтерек» арқылы басым салаларды қаржыландыру көлемі тек бірінші жартыжылдықта 2,9 трлн теңгені құрағанын айтты. Ол жыл соңына дейін қаржыландыруды 8 трлн теңгеге жеткізуді жоспарлап отыр.
Ал наурыз айында «Бәйтерек» холдингінің капиталын биыл 1 трлн теңгеге арттыру жоспарланғаны белгілі болды.
