Ашхабадта Абай Құнанбайұлына арналған ескерткіш ашылды – Қазақстан-Түрікменстан достығының жаңа символы
Абай – әлемдік деңгейдегі ұлы тұлға. Оның шығармалары бүкіл адамзатқа ортақ, баға жетпес мұраға айналды. Әлемнің көптеген қалаларында Абайдың құрметіне ескерткіштер орнатылған. Ұлы жазушы өз өмірін халықты ағартуға арнады. “Барынша көп білуге ұмтыл”, – деп жазған Абай, халықты білім мен ағартушылық жолымен жүруге шақырды. Оның баға жетпес еңбектерінде мәңгілік құндылықтар дәріптеліп, патриотизм, еңбекқорлық пен білімге деген сүйіспеншіліктің маңызы туралы айтылды. Абай гуманизмге, мейірімділікке және парасаттылыққа шақырды.
Ашхабадта Абай ескерткішінің ашылуы – біздің елдер арасындағы бауырластық қарым-қатынастарды нығайтуға бағытталған ерекше маңызды бастама, – деді Қасым-Жомарт Тоқаев. Президент осы жылы Астанада түркіменнің ұлы ойшылы Махтумқұлы Фраги ескерткішінің орнатылғанын еске салды, оған елімізде ерекше ықыласпен қарайды, ал оның шығармалары барлық түркі халықтарына ортақ.
“Абай мен Махтумқұлының еңбектері түркі әлемінің құнды мұрасы. Біздің ортақ міндетіміз – оны сақтау және болашақ ұрпаққа жеткізу. Екі ұлы ақынның поэзиясындағы сабақтастықтың көптеген үлгілері бар. Біздің халықтарды ортақ тамырлар, ортақ тарих, ұқсас тіл мен мәдениет байланыстырады. Осы мызғымас негізде біз берік және үйлесімді қарым-қатынастарды құрдық, олар қазір стратегиялық серіктестік рухында қарқынды дамуда. Мұның дәлелі – менің бүгінгі Түрікменстанға ресми сапарым. Ұлы Абай ескерткіші қазақ-түрікмен достығының символына айналады деп сенемін”, – деді мемлекет басшысы.
Халк Маслахатының төрағасы бауырлас халықтардың тарихы мен мәдениетінде із қалдырған ұлы тұлғалардың, ойшылдар мен ақындардың мұрасын сақтаудың маңыздылығын атап өтті:
“Бүгін біз Ашхабад қаласының ең көрікті саябақтарының бірінде қазақ халқының ұлы ақыны және ойшылы Абай Құнанбайұлының ескерткішін салтанатты түрде ашып отырмыз. Баршаңызды осы маңызды оқиғамен құттықтаймын! Біздің халықтарымыз әлемдік мәдени және рухани құндылықтар қазынасына үлкен үлес қосты. Сондықтан осы баға жетпес мұраны терең зерттеу, оны кеңінен насихаттау және халықаралық ынтымақтастықты дамыту – ең маңызды міндеттердің бірі”, – деді Гурбангулы Бердімұхамедов.
Іс-шараға Түрікменстанның шығармашылық зиялылары мен Қазақстанның ресми делегациясының мүшелері қатысты.
