Абай облысына 3,5 трлн теңге инвестиция тартылды
Абай облысында 3,5 трлн теңге көлемінде инвестиция тартылды, деп хабарлады облыс әкімі Берік Уәли Орталық коммуникациялар қызметінде өткен брифингте, dailykz мәліметіне сүйеніп.
Аймақта бизнесті қолдау және инвестиция тарту бойынша жүйелі жұмыс жүргізілуде. Биылдан бастап жүзеге асырылатын инвестициялық жобалар саны 29-дан 97-ге дейін өсті, ал тартылған инвестициялар көлемі 2,2 трлн теңгеден 3,5 трлн теңгеге жетті. Солардың ішінде 50 жоба Ұлттық цифрлық инвестициялық платформаға енгізілген.
Үлкен инвестициялық жобалардың бірі – “Аягөз – Бақты” теміржол желісін салу жобасы. Оның жалпы ұзындығы 297,5 км, құны – 577,5 млрд теңге. Бұл ауқымды жоба мемлекет басшысының тікелей тапсырмасымен басталып, өңір мен елдің дамуына жаңа серпін беруге бағытталған. Жобаны іске асырушы ұйым – China Harbour Engineering Company. Жоба үшін 10,5 мың гектар жер учаскесі резервтелген.
Технико-экономикалық негіздеме бекітілген, жоба 2023 жылы іске қосылған. Қазіргі уақытта 30 млрд теңге инвестиция салынған.
Сонымен қатар, өнеркәсіп саласында түрік компаниясы Miryildiz Kz Ltd. жалпы құны 480 млн АҚШ долларын құрайтын алтын өңдейтін зауыт құрылысы жобасын жүзеге асыруға кірісті. Жобаны пайдалануға беру 2027 жылдың желтоқсанына жоспарланған.
Осы жылы жалпы сомасы 25,9 млрд теңге болатын 14 жобаны іске асыру жоспарланған, олар 453 жұмыс орнын құруға бағытталған. Қазіргі уақытта 7 жоба іске қосылып, 13,3 млрд теңге инвестиция тартылды, 124 жұмыс орны құрылды. Жыл соңына дейін 7 жобаны, жалпы құны 12,6 млрд теңге болатын нысанды пайдалануға беру жоспарлануда.
