«Барлық жанармай бекеттері жабық»: Қазақстанда автогаз жетіспеушілігіне министрлік жауап берді

Қазақстанның Энергетика министрлігі Алматы және Түркістан облыстарында автогаздың тапшылығы туралы тұрғындардың шағымына түсініктеме берді, деп хабарлайды dailykz.

Қазақстандықтар әлеуметтік желілерде автогаздың жанармай бекеттерінде жоқтығына шағымданған. Мысалы, TikTok қолданушысы Ersan77.kz Алматыдан Балқашқа дейін автогаз таба алмағанын айтқан:

«Алматыдан Балқашқа дейін газ мүлде жоқ. Барлық жанармай бекеттері жабық, мүмкін сату шектелген шығар. Алматыда күніне 1 тоннадан артық сатылмау лимиті қойылған. Біз бензинмен толтырамыз», – деп жазды ол.

Министрліктің жауабы

Энергетика министрлігінің баспасөз қызметі Алматы және Түркістан облыстарындағы газ жағдайына түсініктеме берді:

• Алматы облысы:

«Аймаққа отын жеткізу жоспарлы режимде жүргізілуде. Кейбір жанармай бекеттеріндегі уақытша тоқтап қалулар – қазан айына арналған квотаның соңғы күндерде толық игерілгенінен болды. Бұл елдегі өндірістің жоспарлы жөндеу жұмыстарына байланысты уақытша қысқаруымен түсіндіріледі.
Қараша айына Алматы облысына 6 728 тонна газ бөлінді. Жеткізу жаңа жоспар бойынша басталды және кестеге сәйкес жүргізілуде. Қазіргі таңда әкімдіктің мәліметі бойынша аймақта 1 214 тонна газ қоры бар. Күніне 270 тонна тұтыну көрсеткіші бойынша бұл көлем облыстың қажеттілігін қамтамасыз етуге жеткілікті», – делінген министрліктің хабарламасында.

• Түркістан облысы:

«Кейбір жанармай бекеттерінде байқалған тоқтап қалулар – қазан айына арналған газ көлемінің соңғы күндерде толық игерілгенінен болды. Бұл да елдегі өндірістің жоспарлы жөндеу жұмыстарына байланысты уақытша қысқарумен байланысты.
Жағдайды тұрақтандыру үшін министрлік жедел шаралар қабылдады: қараша айына арналған жеткізулер басымдықпен басталды. Облысқа 11 774 тонна газ бөлінді. 3 қарашаға дейін 1 594 тонна жеткізілген және жолда. Вагон-цистерналарды жеткізуді жеделдету жұмыстары жүргізілуде», – делінген хабарламада.

Бағаның әділетсіз өсуі бойынша шағымдар

Министрлік сондай-ақ мүмкін болатын бағаның негізсіз өсуі туралы фактілерді мына телефондарға хабарлауға болатынын ескертті:

• 8 701 855 02 48
• 8 (7172) 57 44 81

Еске сала кетейік, Қазақстанда бірнеше күн бұрын АИ-92 бензині мен автогаз бағасының өсуі бойынша шағымдар қабылдайтын желі ашылған. Бұл ретте баға мораториясының бұзылуы тіркеліп отыр.

Октябрь айының ортасында Қазақстанда АИ-92 маркалы бензин мен дизель отынының бағасын көтеруге мораторий енгізілген болатын.