Демеу Жадраев Олимпиада-2024-тен кейінгі алғашқы турнирінде жеңімпаз атанды
Грек-рим күресінен Қазақстан құрамасының көшбасшыларының бірі Демеу Жадраев Германияда өткен беделді турнирде чемпион атанды, деп хабарлайды dailykz Ұлттық олимпиадалық комитетке сілтеме жасап.
Дортмунд қаласында өткен “Гран-при” жарысында қазақстандық балуандар жалпы жеті медаль иеленді. Оның ішінде екі алтын бар.
Олимпиада-2024-тің Париждегі күміс жүлдегері Жадраев 77 келі салмақ дәрежесінде қарсыластарынан басым түсіп, алтын медаль жеңіп алды. Бұл — оның Олимпиададан кейінгі алғашқы ресми жеңісі.
Сондай-ақ Дортмундтағы турнирде 67 келіде өнер көрсеткен Багдат Сабаз да алтын медаль иегері атанды. Күміс жүлдені Ербол Камалиев (60 кг) пен Омар Сатаев (82 кг) еншіледі. Қола медальға Айбек Сабырбеков (60 кг), Асаухат Мұхамадиев (63 кг) және Мейіржан Шермаханбет (67 кг) қол жеткізді.
Демеу Жадраев Олимпиада-2024-тен кейінгі жеңісімен қазақстандық жанкүйерлерін қуантты, ал Дортмундтағы бұл жетістік ел құрамасының жоғары деңгейдегі дайындықты жалғастырып жатқанын көрсетті.
