Иран Оңтүстік Кавказдағы “Трамп маршрутын” зиратына айналдыратынын ескертті
Иран Азербайжан мен оның эксклавы Нахичевань арасындағы көлік дәлізі жобасына қарсы шықты. Бұл туралы dailykz РБК-ға сілтеме жасап хабарлайды.
Жергілікті БАҚ-қа сүйенген басылым мәліметінше, Иран Оңтүстік Армениядағы Зангезур дәлізі арқылы өтетін және АҚШ-қа 99 жылға жалға берілетін, халықаралық бейбітшілік пен өркендеуді қолдау үшін “Трамп маршруты” деп аталатын көлік жолы жобасына қарсылық білдіріп отыр.
Бұл туралы ислам республикасының жоғарғы көшбасшысының кеңесшісі Әли Акбар Велаяти мәлімдеді.
Велаятидің сөзінше:
“Оңтүстік Кавказ – ешкімнің жері емес пе, оны Трамп жалға ала алады ма? Кавказ – әлемдегі ең сезімтал географиялық аймақтардың бірі, және бұл дәліз “Трамптың жалдамалыларының зиратына” айналады, транзиттік жол емес,” – деді ол.
Сонымен қатар, Велаяти Ресейдің “стратегиялық тұрғыдан бұл дәлізге қарсы екенін” айтты, алайда Иран Оңтүстік Кавказдың қауіпсіздігін өз бетінше қорғауға ниетті екенін жеткізді.
Жалпы алғанда, Тегеран көрші елдер арасындағы бейбіт келісімдерді құптайтынын баса айтты.
Айта кетейік:
Өткен жылдың сәуір айында Армения мен Азербайжан арасында шекараларды айқындау процесі басталған еді. Бұл кезде екі ел арасында шекараға жақын төрт азербайжан ауылын қайтару туралы келісім жасалды.
Сол уақытта Азербайжан президенті Ильхам Алиев Алматыда өтетін екіжақты келіссөздерді жариялады. Қазақстан президенті Қасым-Жомарт Тоқаев да осы келіссөздерге қолдау көрсетіп, келіссөздер өткізу үшін алаң ұсынуға дайын екенін білдірген.
Келіссөздер шынында да өтті, екі елдің сыртқы істер министрлері шекараларды айқындаудағы жетістіктер мен қол жеткізілген келісімдерді мақұлдады. Сонымен бірге, әлі шешілмеген мәселелер бойынша диалогты жалғастыруға уағдаласты.
2025 жылдың наурыз айында тараптар бейбіт келісімнің мәтінін бекітіп, ал шілде басында Пашинян мен Алиев Абу-Дабиде кездесті. БАҚ деректері бойынша, олар екі ел арасындағы барлық қарама-қайшылықтарды, оның ішінде Нахичевань эксклавы мен негізгі Азербайжан территориясы арасындағы байланыс ашу мәселесін талқылады.
Жуырда АҚШ президенті Дональд Трамп “тарихи бейбіт саммиттің” басталатынын хабарлады — Ақ үйде Алиев пен Пашинян кездеседі.
Ал одан бұрын, АҚШ-та Алиев пен Пашинян Армения мен Азербайжан арасындағы бейбіт қарым-қатынастар туралы декларацияға қол қойды.
