«Нәтиже мінсіз»: Бельгия құрамасының бапкері Қазақстанға қарсы матч жайлы пікір білдірді
Бельгия ұлттық құрамасының бас бапкері Руди Гарсия 2026 жылғы әлем чемпионатының іріктеу кезеңінде Қазақстан құрамасын 6:0 есебімен жеңген ойынға қатысты пікір білдірді, деп хабарлайды dailykz.
Гарсияның ойы
Матчтан кейінгі баспасөз мәслихатында жаттықтырушы командасының жеңісін былайша бағалады:
«Бұл жеңіс оңай болды деп айтуға келмейді – біз өз көзқарасымыз бен қарқынымыздың арқасында ойынды жеңілдеттік. Нәтиже шын мәнінде мінсіз: бірде-бір дисквалификация жоқ, бірде-бір жарақат жоқ, екі ойын қатарынан қақпамызға гол соғылған жоқ», – деді Руди Гарсия.
Сонымен бірге ол құраманың бірнеше ойыншысын ерекше атап өтті.
Жеке ойыншыларға баға
«Кевин Де Брюйне ойынын ерекше атап өткім келеді. Біз оның өнерін әрі клубта, әрі ұлттық құрамада тамашалай аламыз. Ол керемет ойыншы, нағыз лидер және ең бастысы – мотивация беруші. Италияда мұндайды “fuoriclasse” дейді – категориядан тыс шебер», – деді бапкер.
Шарль де Кетелареге қатысты ол:
«Ол біз күткендей ойнады: техника, күш, бірқалыпты төзімділік көрсетті. Әзірге гол соқпағаны ғана кемшілік. Бірақ бұл оның ойынының сапасын төмендетпейді. Сондықтан оны соңына дейін алаңда қалдырдым – өзіне сенімді болсын дедім. Маңыздысы – кімнің соққаны емес», – деп қосты Гарсия.
Қазақстан құрамасының жағдайы
Еске сала кетейік, Қазақстан құрамасы Брюссельдегі «Лотто Парк» стадионында өткен ойында алаң иелеріне 0:6 есебімен есе жіберді. Бұл – ұлттық құраманың Әли Әлиев басшылығымен алған ең ауыр жеңілісі.
Кездесуден кейін бас бапкер Әли Әлиев отставкаға кеткенін жариялады:
«Бәріне мен жауаптымын. Бұл – менің кінәм. Футболшылардың ешқайсысы бұған лайық емес. Отставкаға арыз жазамын. Елге оралған соң федерация басшылығына хабарлаймын», – деді ол.
