Никтурия деген не: себептері мен емделу жолдары
Көптеген адамдар жасы ұлғайған сайын түнде бірнеше рет оянып, дәретханаға баруды әдеттегідей қабылдайды. Бірақ бұл жағдай кейде жай ұйқының бұзылуы емес, нақты медициналық мәселе болуы мүмкін. Мұндай құбылыс медицинада никтурия деп аталады.
Никтурия – бұл адамның түнгі уақытта зәр шығару қажеттілігімен бірнеше рет оянуы. Әдетте, сау адам түнде бір реттен артық зәр шығаруға мұқтаж болмайды. Егер бұл жағдай жиі қайталанса және күнделікті өмірге, ұйқы сапасына әсер етсе – оны елемеуге болмайды.
Никтурияның негізгі себептері:
- Жасы ұлғайған сайын бүйрек функциясы мен гормондық тепе-теңдік өзгеріп, зәр түнде көбірек түзілуі мүмкін.
- Созылмалы аурулар, мысалы, қант диабеті немесе гипертония, зәр шығару жүйесіне әсер етуі ықтимал.
- Простатаның үлкеюі (ер адамдарда) немесе қуықтың шамадан тыс белсенділігі (әйелдерде де болуы мүмкін) – зәрдің жиі шығуына себеп болады.
- Сұйықтықты көп тұтыну, әсіресе ұйықтар алдында шай, кофе немесе алкоголь ішу – зәр көлемін арттырады.
- Жүрек жеткіліксіздігі немесе бүйрек аурулары да түнгі зәр шығаруға әкелуі мүмкін.
Бұл жайсыздық қалай әсер етеді?
Никтурия – адамның ұйқы сапасын күрт төмендететін фактор. Ұйқының бұзылуы күндізгі шаршаңқылыққа, зейіннің төмендеуіне, ашушаңдыққа және тіпті депрессияға апаруы мүмкін. Ең сорақысы, егде жастағы адамдар үшін түнгі уақытта дәретханаға бару кезінде құлап кету қаупі жоғары.
Қашан дәрігерге көріну керек?
Егер сіз түнде 2 реттен жиі оянсаңыз және бұл жағдай бірнеше апта бойы байқалса, урологқа немесе терапевтке қаралған жөн. Дәрігер қажетті зерттеулер жүргізіп, себебін анықтап, дұрыс емдеу тәсілін ұсынады.
