«Оны жазалауым керек еді»: Бублик жеңістен кейін франциялық қарсыласына қатаң жауап берді
Қазақстанның бірінші ракеткасы Александр Бублик Франция спортшысы Корентен Мутемен болған қағидалы кездесуден кейін қарсыласына қатысты пікір білдірді, деп хабарлайды dailykz.
ATP 1000 сериясындағы Париждегі хард турнирінің екінші айналымында өткен матч қос теннисші арасындағы бұрынғы шиеленісті жалғастырды. Бұған дейін Муте Бублик туралы сын пікірлер айтып, кездесуге дейін «оны үйіне қайтаруға бар күшімді саламын» деп мәлімдеген болатын. Сондай-ақ ол қазақстандық спортшының ойын мәнерін және корттағы мінез-құлқын «қолайсыз әрі құрметсіз» деп атаған.
Алайда матч соңында жеңіске жеткен Александр Бублик камераға маркермен «Үйіңе қайт» деп жазып қалдырды. Кездесуден кейін ол бұл жазбаның мәнін түсіндіріп, қарсыласына қатысты ойын ашық айтты.
«Матч алдында ол тым көп сөйледі. Мен оны жазалауым керек еді. Басқа амал болған жоқ. Ол мені үйіме қайтарғысы келді, бірақ жақсысы – ол Парижде тұрады, таксимен бар-жоғы бірнеше минутта жетіп алады», – деді Бублик ағылшын тілінде берген сұхбатында.
Кейін қазақстандық теннисшіден бұл жағдайды орыс тілінде түсіндіруді сұрады.
«Бізде тамаша бір сөз бар: “Қарғағанша, қарғып өт”. Мен өзіме және командам үшін қажет нәрсені жасадым. Маған матч алдында қарсыластардың тым көп сөйлегені ұнамайды. Әсіресе, жақсы теннис көрсете алмайтындардан», – деді Александр Бублик.
Айта кетейік, осы маусымда Финикс қаласында өткен «Челленджер» турнирінде Бублик пен Мутенің арасындағы матч та даулы сәтпен аяқталған болатын. Сол кезде екі спортшының арасында сөз қайшылығы туып, қазақстандық теннисші қарсыласын тіпті жекпе-жекке шақырған еді.
