«Осысыз футбол дамымайды»: Тоқаев спорттан табыс табуға шақырды
Қасым-Жомарт Тоқаев халыққа арнаған Жолдауында кәсіби спортты, әсіресе футболды, табыс көзі ретінде қарастыру керектігін атап өтті, деп хабарлайды dailykz.
Футбол клубтарын жекешелендіру қажеттігі
«Футбол клубтарын жекешелендіру жұмысын жеделдету қажет. Бүгінгі таңда төрт қазақстандық клуб өз иелерін тапты. Бұл іске белсенді атсалысқан кәсіпкерлерге алғыс айтамын.
Бірақ футболды коммерцияландыруды жалғастыру керек. Әлемдік тәжірибе көрсеткендей, онсыз Қазақстанда футбол дамымайды. Кәсіби спортты табысты бизнес индустриясы ретінде қарастыруымыз керек», – деді Президент.
Бұған дейінгі үндеулер
Өткен жылдың наурыз айында Бурабайда өткен IV Ұлттық құрылтайда Қасым-Жомарт Тоқаев кәсіпкерлерді клубтық футболды бизнес ретінде қарауға шақырған болатын.
«Клубтар тек облыстық бюджетке сүйенбеуі керек. Дүниежүзінде қалыптасқан тәжірибедей, өздері табыс табуды үйренулері қажет. Жекешелендірусіз іс алға баспайды. Егер клубтар жеке меншікке өтсе, онда олар шетелдік спортшыларды шақыру құқығына ие болады», – деген еді Мемлекет басшысы.
Алдағы жоспарлар
Биыл наурыз айында Қазақстанда бәсекелестік ортаға берілетін 461 нысан анықталды. Олардың қатарында жеті футбол клубы да бар.
