“Слован” — “Қайрат”: Чемпиондар лигасындағы жауапты матчтың тікелей трансляциясы
12 тамыз, сейсенбі күні қазақстандық “Қайрат” 2025/26 жылғы УЕФА Чемпиондар лигасының кезекті ойынын өткізеді. Бұл жолы алматылықтар сырт алаңда словакиялық “Слованға” қарсы сынға түседі, деп хабарлайды dailykz.
Матч қашан басталады?
Үшінші іріктеу кезеңінің жауапты ойыны Братиславадағы “Тегельне Поле” стадионында өтеді. Басталуы — жергілікті уақытпен 20:15, ал Қазақстан уақытымен 23:15.
Алғашқы ойын Алматыда өтіп, алаң иелері 1:0 есебімен жеңіске жеткен еді. Жалғыз голды кездесудің соңына қарай пенальтиден Қазақстан құрамасының шабуылшысы Дастан Сатпаев соқты. “Слованның” ганалық жартылай қорғаушысы Рахим Ибрахим қызыл қағаз алып, осы матчты өткізіп жібереді.
Егер “Слован” өз алаңында бір гол айырмасымен жеңсе, қосымша уақыт белгіленеді. Нәтиже тағы өзгермесе, жеңімпаз пенальти сериясында анықталады. Қос кездесудің жеңімпазы плей-офф кезеңінде Шотландияның “Селтик” (Глазго) клубымен, ал жеңілгені Еуропа лигасында Швейцарияның “Янг Бойз” (Берн) командасымен ойнайды.
Қай арнадан көруге болады?
Матчтың ресми тікелей трансляциясын республикалық “Qazsport” телеарнасы және “Кинопоиск” онлайн-кинотеатры (сайт пен қосымша арқылы) ұсынады.
“Қайрат” пен “Слован” қанша рет чемпион болды?
Екі команда да ұлттық біріншілікте чемпион атанып, басты еурокубокқа жолдама алды. “Қайрат” өткен маусымда төртінші рет Қазақстан чемпионы болды. Ал “Слован” — Словакия тарихындағы ең титулды клуб, ел біріншілігінде 23 рет (соңғы 7 маусым қатарынан) жеңіске жеткен.
“Қайрат” Чемпиондар лигасында бұрын екі рет өнер көрсеткен, бірақ екінші іріктеу кезеңінен ары аспаған. Биыл команда өз рекордын жаңартты: алғашқы айналымда Словенияның “Олимпия” (Любляна) клубын (1:1 — сырт алаңда, 2:0 — үйде) және Финляндияның “КуПС” (0:2 — сыртта, 3:0 — үйде) командасын жарыстан шығарды.
“Слован” өткен маусымда турнирдің негізгі кезеңінде ойнады — бұл клубтың басты жетістігі. Чехословакия кезінде команда 1968/69 маусымында Кубок иегерлері кубогын жеңіп алған. Биыл олар екінші іріктеу кезеңінде Боснияның “Зриньски” (4:0 — үйде, 2:2 — сыртта) клубынан басым түсті.
Қазіргі жағдайы
Қазақстан чемпионаты “көктем–күз” жүйесімен өтетіндіктен, маусым қызған шағында. “Қайрат” 19 турдан кейін 43 ұпай жинап, көш бастап тұр. Соңғы турдағы ойыны кейінге шегерілген.
Словакия біріншілігі “күз–көктем” жүйесімен ұйымдастырылады және жаңа ғана басталды. “Слован” алғашқы екі ойында бір жеңіс пен бір тең нәтиже көрсетіп, 4 ұпаймен төртінші орында тұр. Олардың да соңғы турдағы матчы кейінге қалдырылған.
Ең қымбат ойыншылар
“Қайраттың” трансферлік құны ең жоғары ойыншысы — 17 жасқа толған күні алаңға шығатын шабуылшы Дастан Сатпаев (1,8 млн еуро).
“Слованның” ең қымбат футболшысы — 24 жастағы Словакия құрамасының шабуылшысы Давид Стрелець (8 млн еуро). Жалпы команда құны — 38,58 млн еуро. “Қайрат” ойыншыларының жиынтық бағасы — 12,8 млн еуро.
“Қайраттың” бапкері
Алматылық клубты 46 жастағы қазақстандық маман Рафаэль Уразбахтин жаттықтырады. “Слованды” — 60 жастағы словак бапкер Владимир Вайсс басқаруда, ол 2013–2015 жылдары “Қайратта” жұмыс істеген. Өткен ойында қызыл қағаз алғандықтан, Вайсс бұл матчта алаң жиегінде бола алмайды.
