Жұмыртқаның сарысы неге пайдалы: ағзаға әсері мен артықшылықтары
Көпшілік күнделікті тұтынатын тағамдардың бірі – жұмыртқа. Оның ішінде сарысы туралы әртүрлі пікірлер айтылады: біреулер оны холестерин көзі деп санаса, енді бірі керісінше, пайдалы заттарға бай екенін алға тартады. Шын мәнінде, жұмыртқаның сарысы адам ағзасына қажет маңызды қоректік заттармен байытылған.
Құрамындағы бағалы элементтер
Жұмыртқаның сарысы – табиғи мультивитамин десек те болады. Ол А, D, Е, K дәрумендеріне, сондай-ақ B тобы дәрумендеріне бай. Сонымен қатар құрамында темір, цинк, фосфор, кальций, селен сияқты микроэлементтер бар.
Ми және жүйке жүйесі үшін маңызды
Жұмыртқаның сарысындағы холин ми қызметін жақсартатын заттардың бірі. Бұл компонент есте сақтау, зейін қою, көңіл күйді тұрақтандыруға көмектеседі. Жүкті әйелдер үшін холин нәрестенің жүйке жүйесінің дұрыс қалыптасуына әсер етеді.
Көру қабілетіне пайдасы
Сарысындағы лютеин мен зеаксантин деген антиоксиданттар көздің тор қабығын ультракүлгін сәуледен қорғайды және жасқа байланысты көрудің әлсіреуіне қарсы әрекет етеді.
Жүрекке зиян ба?
Иә, жұмыртқаның сарысында холестерин бар. Бірақ зерттеулер көрсеткендей, қалыпты мөлшерде тұтыну жүрек-қан тамыр жүйесіне зиян келтірмейді. Керісінше, “жақсы” холестеринді (HDL) арттырып, “жаманын” (LDL) тепе-теңдікте ұстауға көмектеседі.
Күнделікті қолдану нормасы
Дені сау адам күніне 1–2 жұмыртқа жеу арқылы ағзасына қажетті дәрумендер мен минералдарды ала алады. Ал егер қандағы холестерин деңгейі жоғары болса немесе дәрігердің арнайы ұсынысы болса, қолдану мөлшерін шектеу керек.
